مقتطفات اسبوعية

السبت
كان بداية الاسبوع وطبيعيا يكون هذا اليوم هو يوم ترتيب الاوراق والمهام نظرا لانه ماكو مراجعات لا بالوزارات ولا بشركات النفط ....

الاحد
اجتماع مع koc (شركة النفط) من صباح الله خير مهندس هندي يقرررر(يسولف) علينا لمدة ساعتين وما فهمت منه الا ربع الحجي تدرون ليش لاني كنت مشغول بالنظر لبوفيه ((الريوق )) طبعا كل هالدوخه علشان مناقصه ما تسوى 500,000 الف دينار صيانه مبنى لستة اشهر...عموما من بعد صلاة الظهر توجهنا للأجتماع مع هندسة المشاريع بجامعة الكويت لمناقشة اخر امور العقد معاهم....ورجعنا للشركة وطبعا ضريبة هالاجتماعات ، اننا كملنا الدوام لي الساعه 8 مساء ورجعت البيت وانا ادور عالفراس وين ......

الاثنين
كان يوم عادي روتين مكرر للدوام ...اجتماع اداري ...وتوقيع اوراق ...وغيره بس استفدت شغلة وحده اني الساعة 7 مساء قعدت صوب شاطئ الشويخ ساعتين علشان اتنفس الصعداء ...

الثلاثاء
كان يوم خارج الكويت (بالخفجي ) مع احدى الشركات السعودية.....ومارجعنا الكويت الا الساعة 7 مساء((طبعا حمد لله على سلامتي )) وكل الشكر للأخوان بالشركه على الحفاوه والتقدير (((والمندي الطيب ))).....

الاربعاء
فعلا كان يوم متعب للغاية ، لانه كان يوم مليء بالاجتماعات بالشركه ، وكان ايضا يوم مميز ونقله نوعية للشركه حيث اننا وقعنا اكبر عقد بعهد الاداره الجديده ، والتي افتخر بأنني احد اعضائها حيث بلغ قيمة العقد (( 19 مليون دينار كويتي)) لمدة خمسة سنوات ....وهو ما سيحقق نقلة جدية للشركة .....وفعلا ما خلصت الدوام الا الساعه 11 مساء بس نفسيا ...جدا جدا مرتاح ... ولله الحمد،،،،،،

الخميس
طبعا الكل بالشركة ينطر هاليوم لانه نص دوام ونهاية الاسبوع ،،المتعب الشاق وعادة يكون هناك هدوء تام ......

_________________________________________

هذا كل شيء هالاسبوع طبعا ،، الغريب بالامر انه ماكو اي برنامج غير الدوام يعني ... لا شباب لاديوانيه لا طلعة مع

الاهل ....الحسنه الوحيده اهي اني كل يوم الصبح اخذ الحلوين الغالين على قلبي واللي علشانهم كل هالشغل وهالتعب ..

(((احمد))) والعسوله القمر وروح قلبي (((الريم))) .........اوصلهم الروضه ..لانه هذا هو الوقت الوحيد اللي اشوفهم

فيه اما الغاليه ام احمد فالله يعينها على متابعه البيت والعيال وهم الدوام.....

بس انا وعدتهم اني اكون معاهم اليوم الخميس والجمعه ان شاء الله .....

بس القدر ((الدوام)) يقول اني بعد الغدى لازم اروح المطار واتوجه للدوحه (قطر ) برفقة المدير العام للشركه علشان

متابعة اخر امور الشركة هناك .....

وطبعا للحين ما بلغتهم.........

ما اقول الا سامحوني على الاطاله وما اقول حق عيالي وامهم الا الله يعينكم واعذروني بأذن الله راح اعوضكم خير عن

هالويك اند ......

والى اللقاء القريب للجميع...........